الحنين اليك

رفدت يدّي نطلب العالي يرجعلي حبيبي اللي راح عليا
دارت ليام و الليالي و خيالو ما يروحش من بين عينيا


قلبي راه معلّق بيك يا الغالي و مضنيتش نهوا غيرك في هاذ الدنيا


توحشت هدرتك و ضحكتك و توحشت كي تقولي أنا ليك و انتيا ليا


أنا قلت بلاك الفراق ينسّي بصّح ما درتش في بالي يكون بليا


ضاقت الدنيا عليّا و تبدل حالي حتّى حارو فيّا والديّا


صحاباتي و جيراني حتّى لي ما يعرفونيش تخلعو فيّا


شينّي الهمّ و تبدل لوني وصلت عدياني تشفهم حالتي هاديّا


وليت نسهر كامل اليالي وما يتغمضوش عينيّا


نقول بلاك يجيني خيالك و نشوفك و لو ثانية


ما كانش هذا تخمامي هذي الغربة اللي بيّا


داتك عليّا بنت الحرام و خلاتني نستنا تجيني منك بريّا


نتفكرك كي ناكل و كي نرقد وحتى في منامي عسّاس عليّا


ما تروحش كامل من بالي و كي نوض تصبّح عليّا


ذبلت الوردة لي انت غرستها خطرش الماء خلاص عليا


طاحو كامل وراقي كي انت ما راكش تسقي فيا


نقولك حاجة راهي في قلبي هي سباب الكية


راني خايفة يجي اليوم الي ما يرحم و يديني بلا ما نشوفك قدام عينيا


ما تخافش نبقى ديما نتفكرك وواحد ما يديك عليا


بصح بلاك على روحك يهفك زين القاوريا


تجريك و تطمعك و تنسيك حتى فيا


بصح نبقى انا نحبك و ان شاء الله ربي يخليك ليا


انت اللي تعمرلي حياتي و بيك انا ديما مهنيا


انت حبي و مكتوبي و اللي ندير معاه انا الدرية